У Бруселі прайшоў марш супраць тэрору
У нядзелю днём у сталіцы Бельгіі некалькі тысяч чалавек узялі ўдзел у маршы «Супраць нянавісці і тэрору». Яго мэта, па словах арганізатараў — паказаць адзінства краіны і разнастайнасць нацый, якія пражываюць у ёй і жадаюць жыць у міры.
Амаль месяц таму ў аэрапорце і метро Бруселя былі здзейсненыя тэракты, у якіх загінулі 32 чалавекі. Адказнасць ўзяла на сябе групоўка «Ісламская дзяржава».
Тыя, хто перажыў гэтыя напады, а таксама сваякі загінулых разам з медпрацаўнікамі і супрацоўнікамі аэрапорта, якія аказвалі першую дапамогу пацярпелым, узначалілі працэсію. Больш за 50 чалавек, пацярпелых пры выбухах, па-ранейшаму застаюцца ў шпіталях.
Цяперашні марш удалося правесці толькі з другой спробы, бо намечанае на канец сакавіка шэсце было адменена з-за пагрозы бяспекі і недахопу паліцэйскіх сіл для забеспячэння парадку.