Сёння беларусы змогуць убачыць «зорны дождж»
Пік актыўнасці метэорнага патоку Майскія Акварыды сёлета прыпадае на ноч з 5 на 6 мая. Убачыць «зорны дождж» змогуць і беларусы.
Акварыды. фота nasa.gov
Найлепшы час для назірання выпадзе з 23:00 5 мая да 4:30 6 мая. Прагназуемы лік метэораў пры ідэальных умовах назірання складзе ад 30 да 50 у гадзіну. Асобныя знічкі будуць бачныя і ў іншыя дні аж да 28 мая.
Радыянт Майскіх Акварыдаў знаходзіцца ў сузор'і Вадалея побач з зоркай Эта Вадалея. Візуальна будзе здавацца, што метэоры будуць вылятаць з гэтага пункту ў розныя бакі.
Назіраць метэорны паток зручней за ўсё за горадам — там, дзе не будзе замінаць гарадское засвятленне. Знічкі будуць бачныя толькі пры ясным надвор'і. Сёлета пік Акварыдаў выпадае на маладзік — святло месяца не перашкодзіць назіранню за зоркамі.
Майскія Акварыды — метэорны паток, звязаны з каметай Галея, вядомы яркімі і хуткімі метэорамі. Кожны элемент «зорнага дажджу» — аскепак каметы, які згарае ў зямной атмасферы.