Пратэсты ў Сухумі: пратэстоўцы паспрабавалі падпаліць будынак МУС і дабіліся адстаўкі міністра
У Сухумі дэманстранты, якія патрабавалі адстаўкі міністра ўнутраных спраў непрызнанай Абхазіі, кінулі ў будынак МУС бутэльку з запальнай сумессю.
sputnik-abkhazia.ru
У выніку загарэўся казырок над уваходам у міністэрства. Міліцыі ўдалося аператыўна патушыць агонь.
Дэманстранты таксама распачалі трэцюю за дзень спробу штурму міністэрства. У выніку паміж пратэстоўцамі і супрацоўнікамі міліцыі адбыліся сутыкненні. З абодвух бакоў ёсць пацярпелыя, ад шпіталізацыі яны адмовіліся.
Паводле непацверджаных звестак, у будынку МУС знаходзіцца міністр Леанід Дзапшба, адстаўкі якога за пагаршэнне крымінагеннай абстаноўкі ў рэгіёне патрабуюць дэманстранты. Людзі, якія сабраліся, скандавалі: «Выходзь!», піша meduza.io.
Як потым паведаміў інтэрнет-сайт Спутник-Абхазия, прэзідэнт Абхазіі Рауль Хаджымба абвясціў у «мэтах недапушчэння кровапраліцця» пра адхіленне ад пасады Леаніда Дзапшба на час расследавання генпракуратурай акцый пратэсту апазіцыі.
На 10 ліпеня ў Абхазіі прызначаны рэферэндум аб датэрміновых выбарах, апазіцыя патрабуе яго адмяніць. На галасаванне вынесена пытанне: «Ці лічыце вы неабходным правядзенне датэрміновых выбараў прэзідэнта рэспублікі Абхазіі?»
***
23:53
Пасля таго, як віцэ-прэзідэнт Абхазіі Віталь Габніа зачытаў ўказ прэзідэнта Абхазіі аб адхіленні Леаніда Дзапшба ад займанай пасады, удзельнікі мітынгу ля будынка МУС пачалі разыходзіцца, паведамляе Sputnik-abkhazia.ru.
Выкананне абавязкаў міністра ўнутраных спраў ускладзена на першага намесніка міністра ўнутраных спраў Барыса Абітава.
У сваю чаргу прэзідэнт непрызнанай большасцю краін Абхазіі Рауль Хаджымба назваў сённяшнія падзеі спробай дэстабілізаваць палітычную абстаноўку.
«Тое, што сёння адбываецца - гэта спроба дэстабілізаваць сітуацыю ў краіне, сабраўшы тыя апазіцыйныя сілы, якія яшчэ, літаральна, некаторы час таму ставілі пытанне аб правядзенні рэферэндуму, і атрымалі права на яго правядзенне», - заявіў Хаджымба.