У Пінску святлафор зваліўся на пешахода
У Пінску на вуліцы Першамайскай раніцай 17 жніўня святлафор зваліўся на пажылога мужчыну.
Як паведамілі БелаПАН у аддзяленні па агітацыі і прапагандзе ДАІ УУС Брэсцкага аблвыканкама, гэта здарылася пасля таго, як «МАЗ» выехаў на правы па ходзе руху тратуар і наехаў на святлафор. Пры падзенні ён зачапіў пешахода.
Паводле папярэдняй інфармацыі, 35-гадовы кіроўца грузавіка не абраў бяспечную хуткасць руху, не ўлічыў інтэнсіўнасць руху і не справіўся з кіраваннем.
78-гадовы пешаход з закрытай чэрапна-мазгавой траўмай, траўмай грудной клеткі і пераломам рэбраў шпіталізаваны ў Пінскую цэнтральную бальніцу.
Кіроўца і пешаход — жыхары гарадскога пасёлка Лагішын.
Па факце ДТЗ праводзіцца праверка.