Халодная вайна: ЗША прыпыняюць перамовы з Расіяй па Сірыі
ЗША заявілі ў панядзелак, што прыпыняюць перамовы з Расіяй па ўрэгуляванні сітуацыі ў Сірыі, і абвінавацілі Маскву ў недатрыманні сваіх забавязанняў па дамове аб спыненні агню.
«ЗША прыпыняюць удзел у двухбаковых каналах [сувязі] з Расіяй, устаноўленых, каб дасягнуць спынення баявых дзеянняў, — заявіў прэс-сакратар Дзяржаўнага дэпартамента ЗША Джон Кірбі. — Гэтае рашэнне не было лёгкім», — цытуе яго агенцтва Ройтэрз.
У сваёй заяве Кірбі адзначыў, што ЗША працягнуць кантактаваць з расійскімі вайскоўцамі, каб унікаць канфліктнага перасячэння ў Сірыі. Але пры гэтым ЗША адклічуць увесь персанал, адпраўлены для падрыхтоўкі вайсковага супрацоўніцтва з Расіяй ў рамках апошняга пагаднення аб спыненні агню.