На месцы будаўніцтва трэцяй лініі метро здарыўся пажар ФОТАФАКТ
Ноччу 18 лістапада, каля 02.26, супрацоўнікам МНС паведамілі пра пажар на будаўнічай пляцоўцы насупраць дома па вуліцы Талстога, 4 у сталіцы.
Там цяпер пракладаюць трэцюю лінію метро. У выніку інцыдэнту згарэла спецабсталяванне, паведамляе прэс-служба Упраўлення МНС па Мінску.
Высветлілася, што гарэў ін'екцыйны комплекс MiniJet Tecniwell TWG 11 (італьянскай вытворчасці 2007 года).
Такая машына выкарыстоўваецца для падачы цэментавага раствора пад ціскам. З дапамогай стварэння грунтацэментных калон умацоўваюцца падмуркі, катлаваны або масівы горных парод.
Праз дзесяць хвілін пасля выкліку пажар быў ліквідаваны. Але машына згарэла цалкам. Меркаваная прычына надзвычайнага здарэння — кароткае замыканне электраправодкі.