Прэзідэнт Малдовы патлумачыў распараджэнне зняць сцяг ЕС са сваёй рэзідэнцыі
Прэзідэнт Малдовы Ігар Дадон заявіў, што на будынку рэзідэнцыі кіраўніка дзяржавы надалей будзе вісець толькі сцяг краіны. Пра гэта ён сказаў 26 снежня ў эфіры тэлеканала Pro TV.
Ігар Дадон. Фота Reuters
«Заканадаўства рэспублікі Малдова не прадугледжвае, што на дзяржаўных установах павінны лунаць іншыя сцягі. У будучыні ў абавязковым парадку гэта будзе толькі сцяг краіны», — падкрэсліў малдаўскі лідар.
Разам з тым ён адзначыў, што не мае нічога супраць Еўразвяза. «Мы будзем працягваць з ім партнёрскія адносіны, яны застануцца добрымі надалей і будуць развівацца», — запэўніў Дадон.
Акрамя таго, ён патлумачыў, чаму сайт прэзідэнта цяпер на малдаўскай мове, а не на румынскай, як гэта было да яго ўступлення на пасаду. «Прэзідэнт павінен выконваць законы і Канстытуцыю, у якой выразна сказана, што дзяржаўнай мовай рэспублікі Малдова з'яўляецца малдаўская. Я паважаю асноўны закон, і так будзе на працягу ўсяго дзеяння майго мандата», — паабяцаў Дадон.
Ён таксама раскрытыкаваў нядаўняе рашэнне Канстытуцыйнага суда (КС) прызнаць прыярытэтнай Дэкларацыю аб незалежнасці, у якой дзяржаўнай мовай названая румынская. Па словах прэзідэнта Малдовы, Канстытуцыя мае прыярытэт перад іншымі дакументамі, а з рашэннем КС «яшчэ трэба будзе разабрацца».
26 снежня з будынку рэзідэнцыі прэзідэнта Малдовы знялі сцяг Еўрасаюза. Пазней група дэпутатаў ад Ліберальнай партыі паспрабавала вярнуць сімвал ЕС на будынак, назваўшы яго зняцце антыканстытуцыйным і незаконным, а таксама заявіўшы, што гэта можа прывесці да ахаладжэння адносін Кішынёва і Брусэля.
Прэзідэнцкія выбары ў Малдове прайшлі ў два туры, 30 кастрычніка і 13 лістапада, перамогу атрымаў Ігар Дадон. Падчас перадвыбарчай кампаніі ён не раз крытыкаваў узяты ўрадам рэспублікі курс на шчыльную інтэграцыю з ЕС.