Беларускія тэлеканалы нічога не паведамілі пра саміты ЕАЭС і АДКБ без Лукашэнкі
У вячэрніх праграмах навін беларускіх тэлеканалаў СТВ, ОНТ і «Беларусь 1» 26 снежня не было ні слова сказана пра саміты ЕАЭС і АДКБ, што прайшлі ў Санкт-Пецярбургу, паведамляе БелаПАН.
На гэтыя мерапрыемствы Аляксандр Лукашэнка не паехаў без растлумачэння прычын.
Галоўнай тэмай інфармацыйных выпускаў стала жалоба ў Беларусі па ахвярах катастрофы расійскага самалёта Ту-154, які ляцеў у Сірыю.
На саміце ЕАЭС была падпісаная новая рэдакцыя Мытнага кодэкса, якую беларускі кіраўнік ўспрыняў насцярожана. На гэтую тэму 9 снежня ён правёў нараду, запатрабаваўшы забяспечыць захаванне інтарэсаў краіны і даць праекту кодэкса «аб'ектыўную ацэнку, узважыць усе за і супраць, пралічыць наступствы і магчымыя рызыкі».