У піку Трампу Нідэрланды ствараюць глабальны фонд падтрымкі даступнасці абортаў
Нідэрланды ствараюць глабальны фонд для падтрымкі даступнасці абортаў для жанчын. Гэта адказ на забарону Трампам федэральнага фінансавання для міжнародных арганізацый, што дапамагаюць жанчынам рабіць аборты.
Пра гэта заявіў прэс-сакратар Міністэрства замежных спраў Нідэрландаў у сераду.
Ініцыятыву падтрымаюць некаторыя іншыя краіны Еўрасаюза, адзначыў ён.
У панядзелак Трамп падпісаў дакумент, які забараняе выдзяленне сродкаў замежным недзяржаўным арганізацыям, якія або аказваюць паслугі абортаў у сваіх шпіталях, або раяць аборты як метад планавання сям'і.
Нідэрландскае заканадаўства аб сям'і і рэпрадуктыўным здароўі — адно з самых ліберальных у свеце.
З ініцыятывай пра падтрымку абортаў за мяжой выступіла Партыя працы — левацэнтрысцкая партыя з урадавай кааліцыі Нідэрландаў.
«Калі прымаюцца рашэнні, кепскія для жанчын у краінах Трэцяга свету, мы павінны тым кабетам дапамагчы», — сказала кіраўніца Партыі працы.
Рэспубліканскія адміністрацыі ў ЗША ад 1984 года перыядычна прымаюць антыабортныя захады, а дэмакратычныя іх адмяняюць.