Злачыннасць: заходняя Беларусь бяспечнейшая за ўсходнюю
Розніца між Заходняй і Усходняй Беларуссю ва ўзроўні злачыннасці захоўваецца, хоць яна і нязначная.
Пра гэта сведчыць статыстыка за 2016 год, якую апублікавала Міністэрства ўнутраных спраў.
Варта адзначыць, што, калі ў 2015 годзе лічба злачынстваў у краіне расла, то ў 2016-м пайшло даволі істотнае зніжэнне. Агулам злачынстваў учынена на 4,2% менш, чым у 2015-м.
Па асабліва цяжкіх злачынствах зніжэнне яшчэ большае: аж на 15,4%. Праўда, на 3,3% вырасла колькасць забойстваў і замахаў на забойствы.
Найбольш, аж на 10%, колькасць злачынстваў знізілася на Берасцейшыне. Самая ж напружаная крымінальная сітуацыя захоўваецца ў прысталічных раёнах. Мусіць, ад таго, што ў гэтыя раёны ў сілу фінансавых абставін выштурхоўваюцца асацыяльныя элементы з Мінска.