У ЗША прадаюць тэлефон, які належаў Гітлеру
На аўкцыён выстаўлены чырвоны тэлефон, які належаў лідару нацысцкай Германіі Адольфу Гітлеру. Таргі пройдуць у ЗША ў гэтыя выхадныя, піша ВВС.
Тут і ніжэй фота: AFP
Тэлефон, на задняй часткі якога выгравіраванае імя Гітлера і нацысцкая сімволіка, быў знойдзены ў яго бункеры ў Берліне ў 1945 годзе.
Яго знайшлі савецкія салдаты, а затым перадалі брытанскаму брыгаднаму генералу сэру Ральфу Рэйнеру у якасці сувеніра. Тэлефон прадае сын Рэйнера.
Аўкцыён пройдзе ў горадзе Чэсапік Сіці ў Мэрылэндзе.
Аўкцыённы дом Alexander Historical Auctions заявіў, што таргі пачнуцца са 100 тысяч даляраў. Але пры гэтым арганізатары спадзяюцца, што за тэлефон заплацяць каля 300 тысяч даляраў.