У Вялікабрытаніі стварылі разумны прэзерватыў
Фота: britishcondoms.uk
Брытанская кампанія British Condoms пачала прымаць перадзамовы на разумны прэзерватыў i.Con Smart Condom. Пра гэта паведамляе Forbes.
Карыстальніку абяцаюць даць поўную інфармацыю аб палавым акце: яго працягласць, хуткасць і сілу рухаў, колькасць затрачаных калорый, а таксама тэмпературу цела. Вытворцы сцвярджаюць, што прылада таксама будзе папярэджваць аб наяўнасці венерычных захворванняў.
Нягледзячы на назву, i.Con Smart Condom, у сутнасці, не з'яўляецца прэзерватывам. Гэта кальцо, якое чапляецца на звычайны кантрацэптыў і можа перадаваць звесткі праз Bluetooth. Прадаўцы запэўніваюць, што ўся сабраная інфармацыя захоўваецца выключна ананімна, аднак калі ўладальніку вельмі захочацца, ён можа падзяліцца сваімі заслугамі ў сацыяльных сетках.
Як адзначае The Sun, прылада для мужчынскага палавога органа падобная да фітнэс-бранзалета FitBit. Яе кошт — 59,99 фунта стэрлінгаў (каля 140 рублёў).