Бестселерам №1 на «Амазоне» стала кніга без тэксту
Бестселерам на Amazon.com у пятніцу стала кніга «Прычыны галасаваць за Дэмакратычную партыю ЗША. Вычарпальны даведнік» амерыканскага гісторыка і журналіста Майкла Ноўлза.
Самае цікавае ў гэтай кнізе тое, што яна абсалютна пустая, калі не лічыць бібліяграфіі, усе яе 266 старонак абсалютна белыя.
amazon.com
Выданне каштуе $8,03 і рэкламуецца як «найбольш падрабязны аналіз і самы поўны набор аргументаў за Дэмакратычную партыю на гэты час».
Аўтар кнігі — журналіст кансерватыўнага сайта Daily Wire, выпускнік гістарычнага факультэта Ельскага ўніверсітэта.
Выданне, відавочная мэта якога — тролінг палітычных апанентаў, сабрала амаль 1500 водгукаў на Amazon.com, каля 85% якіх — іранічна-пазітыўныя.
- «Я атрымаў асалоду ад гэтай кнігі і рэкамендую яе для адукацыі кожнага патэнцыяльнага выбарцы. Не бачыў нічога параўнальнага»;
- «Добрая кніга, але я чакаю аўдыяверсію»;
- «Інфарматыўная, захапляльная і крэатыўная. Рэкамендую ўсёй сям'і і сябрам»,
— такія і іншыя каментары пакідаюць карыстальнікі, якія сапраўды купілі выданне на сайце.
Скрыншот з «Амазона»
Аўтар падзяліў выданне на главы «Эканоміка», «Правы чалавека», «Знешняя палітыка» і іншыя, але ў тэлеэфіры прызнаўся, што хоць шмат чытаў па тэме, але не змог знайсці аніводнай прычыны галасаваць за Дэмпартыю ЗША.
Восенню аналагічную пустую кнігу выпусцілі апаненты кансерватараў — яна называлася «Чаму Трамп заслугоўвае даверу, павагі і захаплення». Аднак, як піша nypost.com, яна не паднялася вышэй за 536 месца ў спісе бестселераў «Амазона».