«Хартыю-97» высяляюць з офіса ў Варшаве
Сайт «Хартыя-97» 2 мая атрымаў ліст «Беларускага дома» ў Варшаве з просьбай цягам двух-трох дзён вызваліць памяшканні, якія яны займаюць.
«Беларускі дом» у Варшаве ўзначальваюць Алесь Зарамбюк і Уладзімір Кобец.
«У сувязі з унутранымі патрэбамі Фонд «Беларускі Дом» апавяшчае вас аб неабходнасці вызваліць памяшканні № 2 і 3, якія вы займаеце ў нашым офісе, і здаць ключы ад памяшкання і сейфа да 17:00 пятніцы 5 мая 2017», — гаворыцца ў лісце.
Сайт «Хартыя-97» ужо выказаў здагадку, што гэта правакацыі беларускіх спецслужбаў.
Кобец раней працаваў у «Хартыі», але пасля іх пазіцыі разышліся.
Прадстаўнік «Беларускага дома» Уладзімір Кобец паабяцаў, што арганізацыя цягам дня выступіць з афіцыйнай заявай па гэтым пытанні.
Сайт «Хартыя-97» ад 2011 года працуе ў выгнанні.