Прысуд Навальнаму па справе «Кіраўлеса» ўступіў у сілу. Палітык не зможа ўдзельнічаць у выбарах прэзідэнта Расіі
Суддзя Кіраўскага абласнога суда Міхаіл Абухоў пакінуў без задавальнення скаргу палітыка Аляксея Навальнага і прадпрымальніка Пятра Афіцэрава на прысуд па справе «Кіраўлеса». Такім чынам прысуд уступіў у сілу.
Абвінавачванне на пасяджэнні прасіла пакінуць прысуд без зменаў. Абарона Навальнага і Афіцэрава прасіла адмяніць прысуд. Адвакат палітыка Вадзім Кобзеў заявіў, што прысуд будзе абскарджаны ў Еўрапейскім судзе па правах чалавека.
«Прэзідэнцкая кампанія Навальнага ніяк не залежыць ад прысуду па справе «Кіраўлеса», ніколі не залежала. Мы, вядома, вядзем яе не з аглядкай на гэты прысуд, а ў адпаведнасці з яго юрыдычным і маральным правам балатавацца, якога мы і будзем дамагацца», - заявіў «Медыязоне» кіраўнік перадвыбарчага штаба Навальнага Леанід Волкаў.