Google перастане сканаваць пошту карыстальнікаў для персаналізацыі рэкламы
Кампанія Google вырашыла спыніць сканаваць змест лістоў карыстальнікаў Gmail для персаналізацыі рэкламы. Пра гэта паведаміла кіраўнік воблачных сэрвісаў кампаніі Дайан Грын.
Новаўвядзенне пачне дзейнічаць у 2017 годзе (канкрэтныя даты ў паведамленні не названыя).
Грын адзначыла, што рашэнне прывядзе рэкламу ў Gmail у адпаведнасць з рэкламай у іншых сэрвісах, дзе яна залежыць ад карыстацкіх наладаў.
Сканаванне лістоў для падбору персаналізаванай рэкламы выклікала незадаволенасць карыстальнікаў. У 2014 годзе Google пасля судовага пазову адключыла яго ў адукацыйнай версіі Google Drive. Як піша The Verge, гэтая практыка перашкаджае Google ў працы з кліентамі карпаратыўнай версіі сэрвісу, G Suit, хоць там яна таксама адключаная.
Як піша Ars Technica, Google працягне сканаваць лісты карыстальнікаў для іншых мэтаў - у тым ліку пошуку вірусаў і фільтра спаму.