На Мінскім моры перакулілася лодка з двума рыбакамі за паўтара кіламетра ад берага
«На Заслаўскім вадасховішчы паблізу вёскі Лапаравічы перавярнулася маторная лодка з двума рыбакамі. Самастойна дабрацца да берага мужчыны, якія апынуліся ў вадзе за паўтара кіламетра ад берага, не маглі», — распавялі ў МНС.
Дырэктар будаўнічага прадпрыемства, які стаў сведкам здарэння, на гідрацыкле выратаваў з вады аднаго з рыбакоў. Другога падабралі ратавальнікі, якія таксама падаспелі.
Абодва рыбакі пражываюць у Мінску. Мужчыны былі апранутыя ў выратавальныя камізэлькі, трагедыі атрымалася пазбегнуць.