«Зялёным чалавечкам» забаранілі ўезд у Фінляндыю
У Фінляндыі ўступілі ў сілу папраўкі ў заканадаўства, якія забараняюць уезд у краіну вайскоўцам без апазнавальных знакаў. Папраўкі прыняты ў інтарэсах «забеспячэння тэрытарыяльнай недатыкальнасці» краіны.
Фота Mikhail Japaridze, AOP
Пастанову аб унясенні адпаведных зменаў у прававыя акты падпісаў фінскі прэзідэнт Саулі Нііністэ, паведамляе DW са спасылкай на нацыянальную тэлерадыёвяшчальную кампанію Yle.
Пад дзеянне паправак, якія прымаюцца ў інтарэсах «забеспячэння тэрытарыяльнай недатыкальнасці» краіны, падпадаюць вайскоўцы, «якія дзейнічаюць альбо наўпрост у інтарэсах замежнай дзяржавы, альбо ад яе імя, альбо са згоды гэтай дзяржавы», адзначаецца ў публікацыі.
Гаворка ідзе, у першую чаргу, пра тыя выпадкі, калі гэтыя асобы перамяшчаюцца арганізавана і са зброяй, удакладняецца ў матэрыяле выдання. За парушэнне забароны пагражае крымінальная адказнасць.