«Мы разьлічваем на Беларусь»
Пасол Расеі Аляксандар Сурыкаў заявіў, што Беларусі б варта прызнаць Асецію і Абхазію.
Пасол Расеі Аляксандар Сурыкаў на прэс‑канфэрэнцыі 27 жніўня ў Менску заявіў, што Расея разьлічвае на прызнаньне сувэрэнітэту Паўднёвай Асеціі і Абхазіі з боку Беларусі.
«Гэта сувэрэннае права Беларусі — прызнаваць ці не прызнаваць незалежнасьць, але мы ў гэтым прызнаньні разьлічваем на Беларусь, як на аднаго з самых блізкіх саюзьнікаў».
Пры гэтым ён ня выключыў магчымасьці уступленьня ў будучыні Паўднёвай Асеціі і Абхазіі ў саюз Беларусі і Расеі ды СНГ.
«Але для ўступленьня ў саюзную дзяржаву трэба, як мінімум, прызнаньне Беларусьсю іх незалежнасьці, для ўступленьня ў СНД — прызнаньне ўсімі краінамі — удзельніцамі СНД, — зазначыў Сурыкаў. — Мы не выключаем магчымага разьвіцьця па такім напрамку», цытуе словы расейскага пасланьніка БелаПАН.