Серэна Уільямс нарадзіла дачку
Зорка сусветнага тэніса Серэна Уільямс 1 верасня нарадзіла дачку. Мама і дзіця пачуваюцца добра, перадаюць інфармагенцтвы.
Гэта першае дзіця 35-гадовай спартсменкі. Малая з'явілася на свет у адной з клінік Уэст-Палм-Біч, штат Фларыда (ЗША). Яе вага склала 3,09 кг. Імя немаўляці не паведамляецца.
Мужам Серэны Уільямс з'яўляецца адзін з заснавальнікаў парталу Reddit Алексіс Аганян. Пра сваю цяжарнасць тэнісістка паведаміла 19 красавіка гэтага года, абвясціўшы аб паўзе ў спартыўнай кар'еры на год.
Пры гэтым Уільямс захоўвае другое месца ў рэйтынгу WTA. За сваю кар'еру яна атрымала перамогу ў 72 турнірах WTA, з якіх 23 - гэта турніры Вялікага шлема. Серэна паабяцала вярнуцца да трэніровак у пачатку наступнага года.