Пенсіянер з аўтобуса Пінск — Масква пырнуў нажом памочніка кіроўцы і ўцёк у лес
У Талачынскім раёне пасажыр рэйсавага аўтобуса Пінск — Масква ўдарыў нажом памочніка кіроўцы, паведамляе БелТА.
Злачынства было здзейснена 1 студзеня каля 22 гадзін на абочыне дарогі Мінск — Масква каля вёсцы Старая Будаўка.
Тут падчас стаянкі аўтобуса 62-гадовы пасажыр з Барысава пасварыўся з памочнікам кіроўцы, 56-гадовым жыхаром Пінска. У справу пайшоў нож. Пенсіянер ударыў памочніка кіроўцы і ўцёк у лес.
Ужо праз 40 хвілін міліцыянты затрымалі яго.
Памочнік кіроўцы атрымаў пранікальнае нажавое раненне брушнай паражніны і быў дастаўлены ў рэанімацыю мясцовай бальніцы.
Прычыны сваркі пакуль невядомыя. Агрэсіўнаму пенсіянеру пагражае да 8 гадоў зняволення.