Хакеры выдалілі самы прагляданы кліп Youtube «Despacito»
Пазней доступ да кліпа быў адноўлены.
Хакерская групоўка, якая называе сябе Prosox and Kuroi'sh, узламала групу музычных каналаў Vevo на YouTube, піша Бі-бі-сі.
У прыватнасці, яны падмянілі самы прагляданы ролік у гісторыі сэрвісу, кліп на песню «Despacito» пуэртарыканскіх выканаўцаў Луіса Фонсі і Дэдзі Янкі, уласным відэа. На ім адлюстраваны кадр з іспанскага серыяла «Папяровы дом» (La casa de papel) — людзі ў чырвоных касцюмах і масках са зброяй у руках. У апісанні відэа было напісана «Вызваліце Палесціну».
Пасля хакерскай атакі кліп «Despacito», які меў больш за пяць мільярдаў праглядаў на YouTube, быў выдалены.
Пасля 15:30 доступ да Despacito быў адноўлены.