Візіт спецдакладчыка ПАРЕ ў Беларусь адмяняецца. Ён зламаў нагу
Спецдакладчык па Беларусі Парламенцкай асамблеі Рады Еўропы Андрэа Рыгоні не здолеў наведаць Мінск з запланаваным візітам 6 чэрвеня, піша Радыё Свабода.
«Паводле тых дадзеных, якія мы атрымалі з Парламенцкай асамблеі, спадар Рыгоні зламаў нагу. З-за гэта ён і адмяніў візыт» — паведаміў сёньня кіраўнік беларускай дэлегацыі ў супрацы з ПАРЕ Андрэй Навумовіч.
Паўнамоцтвы Андрэа Рыгоні павінны былі скончыцца напрыканцы чэрвеня. А абірацца спецдакладчыкам па Беларусі яшчэ раз ён не мог з-за таго, што статут ПАРЕ забараняе аднаму і таму ж дэпутату займаць гэтую пасаду болей за два разы.
Да таго ж на апошніх парламенцкіх выбарах у Італіі Рыгоні не абралі дэпутатам нацыянальнага парламента — абавязковая ўмова для працы ў ПАРЕ.
Хто будзе новым спецдакладчыкам па Беларусі ў ПАРЕ, пакуль невядома. Паводле неафіцыйнай інфармацыі з Парламенцкай асамблеі, сярод найбольш верагодных прэтэндэнтаў дэпутаты ад Нідэрландаў, Нямеччыны і Польшчы.