Boeing распрацаваў канцэпт пасажырскага самалёта, які перасякае акіян за 2 гадзіны
Фота: Boeing.
Авіяканцэрн Boeing прадставіў канцэпт гіпергукавага пасажырскага самалёта, які здольны даляцець з Нью-Ёрка ў Токіа за дзве гадзіны.
Па словах прадстаўнікоў канцэрна, самалёт будзе перавозіць пасажыраў з хуткасцю, якая перавышае хуткасць гуку ў пяць разоў, паведамляе «Дзеркало тижня», спасылаючыся на Popular mechanics.
Самалёт мае фюзеляж абцякальнай формы, а яго насавая частка нагадвае іголку. На думку экспертаў, такія рашэнні, апроч іншага, дазволяць мінімізаваць гукавы ўдар пры звышгукавой хуткасці.
Прадстаўлены канцэпт разлічаны на перавозку некалькіх дзясяткаў пасажыраў, але, як мяркуецца, у будучыні можа быць распрацавана большая ці меншая мадэль. Як падкрэслівае выданне, на рынку падобны самалёт з'явіцца праз 20-30 гадоў.