Трамп збіраецца абкласці кітайскія тавары мытамі ў 25%
Прэзідэнт ЗША Дональд Трамп даручыў разгледзець магчымасць увядзення мытаў у 25% на імпарт кітайскіх тавараў і паслуг на суму $ 200 млрд. Пра гэта гаворыцца ў заяве гандлёвага прадстаўніка ЗША Роберта Лайтхайзера, паведамляюць інфармагенцтвы.
Паводле яго словаў, увядзенне мыт у памеры 25% замест запланаваных раней 10% ужо абмяркоўваецца, слуханні па гэтым пытанні пачнуцца ў жніўні.
ЗША абвінавачваюць Кітай у крадзяжы амерыканскай інтэлектуальнай уласнасці, тэхналогій і ажыццяўленні несправядлівай гандлёвай практыкі. У сувязі з гэтым у чэрвені ЗША ўвялі 25-працэнтныя мыты на імпартаваныя з Кітая тавары на суму $ 50 млрд.
Як адзначыў Роберт Лайтхайзер, замест таго, каб прыслухацца да довадаў ЗША і змяніць паводзіны, Кітай увёў меры ў адказ супраць амерыканскіх фермераў і прадпрыемстваў, што закранула 40% амерыканскага экспарту ў Кітай.