«Заклічніку Вячорку трэба зьявіцца 22 сьнежня ў ваенкамат»
Прызывам юнака займаюцца чамусьці супрацоўнікі службы бясьпекі прэзыдэнта. А «заклічнік» - так, яны думаюць, перакладаецца на мову слова «призывник».
Лідэра моладзі БНФ Франака Вячорку затрымалі супрацоўнікі службы бясьпекі прэзыдэнта.Франак выйшаў з пад’езду свайго дому на вуліцы Кальцова і адразу да яго падбеглі.
Франак пасьпеў патэлефанаваць па мабільным тэлефоне сваім паплечнікам і сказаў, што яго цягнуць у машыну. Пасьля гэтага міліцыянты адабралі ў яго мабільнік.
Франак Вячорка паведаміў, што яго прывезьлі ў ваенкамат і патрабавалі ад капітана Быкава, супрацоўніка ваенкамата, каб той уручыў Франаку позву на прызыўную камісію.
Франак запатрабаваў, каб позву яму ўручылі на беларускай мове. Спачатку вайскоўцы й супрацоўнікі службы бясьпекі гаварылі пра «дзьвюхмоўе», але пасьля таго як Франак назваў адпаведныя артыкулы закону аб мовах пайшлі раіцца з кіраўніцтвам.
Нарэшце, вайскоўцы напісалі позву Франаку Вячорку на беларускай мове, скарыстаўшыся слоўнікам. У выніку ў першым сказе напісана: «Заклічніку Франаку Вячорку трэба зьявіцца 22 сьнежня ў ваенкамат а 10‑й раніцы».
Франак Вячорка расказаў, што вайскоўцы назвалі яго «заклічнікам», бо ў слоўніку знайшлі пераклад слова «призыв» — «заклік».
Вячорка сказаў, што заўтра яго хочуць пакласьці ў рэспубліканскі вайсковы шпіталь. Гэта пры тым, што ён мае адтэрміноўку ад службы ў войску яшчэ на 3 месяцы.