Гарадзенец скраў грошы ў таварыша, але яго загрызла сумленне і ён прызнаўся
22-гадовы малады чалавек пражывае ў адным з інтэрнатаў. Там жа жыве яго знаёмы, паведамляе абласная міліцыя.
Раней яны жылі ў адным блоку, таму ў маладога чалавека застаўся дублікат ключа ад пакоя таварыша. Некалькі дзён таму, прыбіраючы ў сваім пакоі, ён знайшоў гэты ключ. Гаспадар пакоя знаходзіўся на працы ў начную змену. Ведаючы, дзе захоўваюцца зберажэнні, хлопец адамкнуў дзверы сваім ключом і скраў частку сумы — 300 даляраў ЗША і 400 беларускіх рублёў.
Як тлумачыць сам малады чалавек, невялікую суму ён выдаткаваў на прадукты і цыгарэты, астатняе прайграў у гульнявых клубах. Пасля гэтага яго пачало мучыць сумленне, ён пра ўсё расказаў таварышу і прыняў рашэнне прызнацца ў зробленым.
Тым не менш яму пагражае да чатырох гадоў зняволення.