У Слоніме два гады таму знік мужчына. Яго знайшлі закапаным у двары
Фота СК
У лістападзе 2017 года ў міліцыю звярнулася жыхарка Слоніма. Без вестак знік яе 61-гадовы брат: ён пайшоў з дому і не вярнуўся. Мужчыну так і не знайшлі, была заведзена крымінальная справа, паведамляе СК.
Следчыя высветлілі, што зніклы доўгі час пражываў з сям'ёй па-за межамі краіны, у Слонім вярнуўся адзін і жыў у доме памерлых бацькоў. З сястрой кантактаваў рэдка, злоўжываў алкаголем.
Праз паўтара года, у ліпені 2019-га, была атрымана аператыўная інфармацыя аб магчымым здзяйсненні забойства. Пад падазрэнне трапіў 58-гадовы жыхар Слоніма, які кантактаваў са зніклым. У далейшым гэтая версія знайшла сваё пацверджанне. Падазраваны прызнаўся ў злачынстве і паведаміў, што забіў мужчыну 9 мая 2017 года ў яго доме падчас канфлікту, што ўзнік пры сумесным распіванні спіртных напояў, пасля чаго закапаў цела ў двары.