У Нясвіжскім раёне адшукалі жанчыну, якая знікла тры дні таму
Пра гэта ў сваім тэлеграм-канале паведаміла прэс-сакратар МУС Вольга Чамаданава.
У апошні раз пенсіянерку, жыхарку вёскі Чановічы Нясвіжскага раёна, суседзі бачылі 1 верасня каля 9 раніцы — яна заходзіла да суседкі. Пасля гэтага сышла ў невядомым накірунку і прапала. Шукаць яе пачалі вечарам 2 верасня, калі ў міліцыю звярнуліся з сацыяльнай службы. Пошукамі займаліся супрацоўнікі міліцыі, ратавальнікі і валанцёры пошукава-выратавальнага атрада «Анёл».
І сёння паблізу той жа вёскі начальнік аддзела крымінальнага вышуку Нясвіжскага РАУС маёр міліцыі Аляксандр Крупко знайшоў бабулю на кукурузным полі.
Як высветлілася, пенсіянерка мае праблемы са зрокам, і на кукурузнае поле заблукала выпадкова. Яна была знясіленая і не магла самастойна перасоўвацца. Яе перадалі для абследавання медыцынскім работнікам. Цяпер жанчына знаходзіцца ў бальніцы. Яе жыццю і здароўю нічога не пагражае.