Апублікавалі размову дыспетчара з пілотам самалёта, які заўважыў іранскую ракету
Пілот іранскага самалёта авіякампаніі «Асеман Эйрлайнз» заўважыў пападанне ракеты ва ўкраінскі самалёт Boeing 737-800 і распавёў пра гэта дыспетчару. Расшыфроўку размовы апублікаваў сайт ТСН.
Гаворка ідзе пра памылкова збіты Іранам 8 студзеня самалёт. У гэты ж момант іншы іранскі самалёт распачынаў пасадку.
«Па маршруце ўспышкі — як ад ракеты. Нешта такое там павінна быць?» — пытаецца пілот, які заўважыў момант катастрофы.
Дыспетчар у адказ удакладняе, дзе адбылася ўспышка і ці не ляціць ракета ў бок Тэгерана. Пілот у сваю чаргу сцвярджае, што ракета ўзляцела з боку горада. На гэта дыспетчар адказаў яму, што на зямлі таксама не разумеюць, дзе крыніца ўспышкі, і выказаў надзею, што праблем для самалёта быць не павінна.