З'явілася дэталізаваная здымка Мінска з вышыні — у тым ліку Дразды і двор КДБ
На замову Дзяржаўнага камітэта па маёмасці ў верасні 2019 года зрабілі ортафотаздымку Мінска і прылеглых тэрыторый. Дэталізацыя высокая: на гэтых кадрах разгледзець аб'екты зверху можна лепш, чым на здымках для іншых мапаў, зробленых са спадарожніка, піша tut.by.
Агульная плошча знятых для ортафотамозаікі тэрыторый — каля тысячы квадратных кіламетраў. Якасць здымкаў — 15 сантыметраў у адным пікселі. Здымку вялі для стварэння зямельна-інфармацыйнай сістэмы (ЗІС) Мінска.
Цэнтр і некалькі «засакрэчаных» будынкаў
На мапе ёсць некалькі заблюраных месцаў: так, закрылі будынкі Міністэрства абароны ў цэнтры горада, СІЗА № 1 («Валадарка») у Пішчалаўскім замку, Палац незалежнасці. У гэтым спісе і пляцоўка за Палацам Рэспублікі — будынак упраўлення вайсковай контрвыведкі знаходзіцца побач з кавярнямі і барамі на вуліцы Інтэрнацыянальнай.
Заблюраны будынак упраўлення вайсковай контрвыведкі на Інтэрнацыянальнай і будынак Мінабароны на праспекце Незалежнасці
Палац незалежнасці на мапах таксама разгледзець нельга
Але ёсць і незаблюраныя цікавыя аб'екты. На праспекце Незалежнасці — на шчасце, недасяжны для большасці дворык КДБ. На здымку бачна, што там прыпаркаваны у тым ліку буйныя аўто.
Двор КДБ
У цэнтры ёсць яшчэ адзін схаваны ад старонніх вачэй двор — на Карла Маркса, 38, пры Адміністрацыі прэзідэнта. Яго ўпрыгожвае толькі яркая клумба.
Двор Адміністрацыі прэзідэнта
Трактарны завод і авіяцыя
Тэрыторыі Трактарнага завода падобныя зверху на поле тэтрыса: бачныя цэхі і тэхніка.
А вось на полі Акадэміі авіяцыі ў Чыжоўцы бачная невялікая экспазіцыя самалётаў. Можна разгледзець нават, якім авіякампаніям яны належалі.
На тэрыторыі Нацыянальнага аэрапорта таксама можна знайсці вядомыя самалёты. Напрыклад, белы самалёт у левым куце выдаюць колер сцяга на хвасце і чырвоныя элементы на крылах — вельмі нагадвае стары прэзідэнцкі «боінг».
Дразды і рэзідэнцыя прэзідэнта ў Заслаўі
Адна з рэзідэнцый прэзідэнта ў Мінску заблюраная, але рэзідэнцыі прэзідэнта ў Драздах і Заслаўі яшчэ даступныя для прагляду з мапаў.
Так, у Драздах, акрамя спартыўных і верталётнай пляцовак, можна разгледзець і добраўпарадкаванне. Каля дома нешта падобнае да фантана, а побач з іншым участкам ёсць нават дзіцячая пляцоўка.
Больш кампактнай выглядае тэрыторыя ў Заслаўі. Заўважылі, што з ранейшага месца знікла альтанка, падораная прэзідэнтам Узбекістана Шаўкатам Мірзіёевым. Яна знаходзілася каля збудавання, падобнага да басейна.