Масавае атручэнне ў Пухавіцкім гарнізоне: навабранцы паелі выбуховага рэчыва
Пра гэта TUT.BY распавяла афіцыйная прадстаўніца Мінабароны Наталля Гаўрусік.
Нагадаем, у пятніцу, 6 сакавіка, стала вядома, што ў адной з вайсковых частак Пухавіцкага гарнізона ўначы шпіталізавалі 13 вайскоўцаў. З дыягназам «атручэнне» іх даставілі ў Галоўны вайсковы клінічны медыцынскі цэнтр Узброеных сіл у Мінску.
Як аказалася, гаворка ідзе пра вайскоўцаў вайсковай часці ў Мар'інай Горцы.
— У беларускім войску няма традыцыі пасвячэння, калі навабранцы ядуць траціл. У вайскоўцаў, сапраўды, у той дзень была стральба, але толькі частка з іх — 13 чалавек — адчулі сябе не вельмі добра. Як удалося высветліць, гэтая група салдат сапраўды пакаштавала выбуховае рэчыва. Чаму яны гэта зрабілі, вайскоўцы не ўдакладняюць, — патлумачыла Наталля Гаўрусік.
Аказваецца, падобная традыцыя ёсць у расійскіх сапёраў, і выпадкі, калі вайскоўцы спрабуюць выбухоўку падчас абраду пасвячэння, там бывалі.
Вайскоўцы з Мар'інай Горкі да гэтага часу ў шпіталі, іх жыццю па-ранейшаму нішто не пагражае.