У метро ездзяць чатырохвагонныя цягнікі, бо зменшылася колькасць пасажыраў?
Чытач «Нашай Нівы» заўважыў, што ў мінскім метро пачалі хадзіць чатырохвагонныя цягнікі. Ці можа быць гэта звязана са змяншэннем пасажырапатоку ў падземцы?
Фота Надзеі Бужан
У Мінскім метрапалітэне «Нашай Ніве» патлумачылі, што цяпер па Аўтазаводскай лініі ходзяць чатырохвагонныя цягнікі завода «Штадлер», якія ў будучыні плануюць эксплуатаваць на трэцяй лініі метро.
«Звычайныя пяцівагонныя цягнікі не змяншалі колькасць вагонаў, — патлумачыў прэс-сакратар Мінскага метрапалітэна Андрэй Дроб. — Чатырохвагонныя цягнікі запусцілі па Аўтазаводскай лініі з лютага, каб машыністы напрацоўвалі навыкі, бо там іншая сістэма кіравання. Такіх цягнікоў эксплуатуецца ўжо шэсць».
Таксама ў метрапалітэне дадалі, што колькасць карыстальнікаў падземкай сапраўды зменшылася праз пандэмію каранавіруснай інфекцыі:
«Раней метро карысталіся каля 800 тысяч чалавек на дзень. Цяпер пасажырапаток знізіўся больш чым на 200 тысяч чалавек у дзень».