У Літве адчыняюцца крамы ў ГЦ Akropolis
Delfi
У найбуйнейшых гандлёвых цэнтрах Літвы Akropolis — у Вільні, Клайпедзе і Шаўлях — адчыняюцца крамы. Пасля таго як урад змякчыў умовы каранціну, крамы адкрываюцца з 23 красавіка. Усе крамы адчыняцца не пазней як 25 красавіка. Асаблівая ўвага ў ГЦ будзе нададзена ажыццяўленню правілаў і кіраванню патокамі пакупнікоў, піша Delfi.lt.
«ГЦ Akropolis гатовыя да адкрыцця крам, мы засумавалі па пакупніках. Ва ўсіх ГЦ ёсць усё неабходнае для бяспекі работнікаў і наведвальнікаў, агульныя прасторы і паверхні перыядычна дэзынфікуюць, працуюць вентыляцыйныя сістэмы. Згодна з дзеючымі правіламі, у ГЦ Akropolis будуць пускаць наведвальнікаў толькі ў масках. Мы прымем меры для разгрупавання наведвальнікаў, каб яны не тоўпіліся ў адным месцы. У выпадку неабходнасці — мы гатовыя абмежаваць паток наведвальнікаў», — сказаў прадстаўнік Akropolis Group Дамінікас Мерцінас.
У Літве за ўвесь час зафіксавалі 1398 выпадкаў каранавіруса, 38 чалавек памерлі, за 22 красавіка зафіксавалі 28 выпадкаў заражэння.