Пад Віцебскам вясковец пайшоў па венікі, а знайшоў 30 мінаў і дзевяць гранат
Фота Сяргея Серабро, «Народныя навіны Віцебска»
У лесе непадалёк ад вёскі Яроміна вясковец, які ішоў рыхтаваць бярозавыя венікі, убачыў іржавыя боепрыпасы. Мужчына адразу патэлефанаваў у міліцыю, і да яго накіравалі групу размініравання з вайсковай часці 5524 унутраных войскаў, паведамляюць «Народныя навіны Віцебска».
Калі сапёры абследавалі наваколле — а ў гэтай мясцовасці падчас вайны ішлі жорсткія баі — яны знайшлі трыццаць 81-міліметровых мінамётных мін, сем 75-міліметровых артылерыйскіх снарадаў, сем ручных абарончых гранат Ф-1 і дзве ручныя наступальныя гранаты РГ-42.
Усе знойдзеныя боепрыпасы сапёры вывезлі і знішчылі.