МУС заявіла, што не дапусціць беспарадкаў на вуліцах падчас выбараў
14 ліпеня на вуліцах Мінска, тады людзі пратэставалі супраць нерэгістрацыі Віктара Бабарыкі. Фота Надзеі Бужан
Беларуская міліцыя не дапусціць хаосу, не дазволіць ладзіць беспарадкі на вуліцах у перыяд прэзідэнцкай выбарчай кампаніі і здольная супрацьстаяць парушальнікам закона. Пра гэта заявіў у сераду намеснік міністра ўнутраных спраў — начальнік міліцыі грамадскай бяспекі Аляксандр Барсукоў у вячэрнім эфіры тэлеканала «Беларусь-1», піша ТАСС.
«Мы не дапусцім хаосу і не дазволім ладзіць беспарадкі на вуліцах, паверце, у нас дастаткова сіл і сродкаў, каб супрацьстаяць тым, хто не жадае выконваць законы», — сказаў Барсукоў.
Паводле яго слоў, цяперашняя выбарчая кампанія праходзіць у напружаных умовах, «праводзяцца несанкцыянаваныя мерапрыемствы, гучаць заклікі да падрыву стабільнасці ў Рэспубліцы». «Тое, што адбываецца цяпер, — гэта частка палітычнай тэхналогіі, якая накіраваная на расхістванне і дэстабілізацыю сітуацыі», — заявіў Барсукоў.
Ён папярэдзіў арганізатараў несанкцыянаваных масавых мерапрыемстваў аб персанальнай адказнасці, а таксама заклікаў грамадзян не ўдзельнічаць у такіх мерапрыемствах. Пры гэтым Барсукоў падкрэсліў, што, правакуючы органы правапарадку на прыняцце прэвентыўных мер, у тым ліку сілавых, арганізатары ставяць пад пагрозу бяспеку людзей.