Расія адстаяла тытул чэмпіёна свету па хакеі з шайбай
Расія – Канада – 2:1. Беларусы прайгралі ў чвэрцьфінале чэмпіёнам свету.
У нядзелю скончыўся 73-ці чэмпіянат свету па хакеі, што сёлета праходзіў у швейцарскіх Берне і Клатэне.
У фінале зборная Расіі перамагла Канаду – 2:1. Вырашальную шайбу закінуў Аляксандр Радулаў.
Гэта трэція залатыя медалі менавіта зборнай Расіі (летась у Квебеку нашыя ўсходнія суседзі таксама ў фінале перамаглі Канаду) і 25-е золата з улікам выступленняў зборнай СССР.
Сёння ў матчы за трэцяе месца Швецыя перайграла зборную ЗША – 4:2.
Зборная Беларусі спыніла свой выступ у чвэрцьфінале, прайграўшы чэмпіёнам свету (3:4).
Наступны чэмпіянат свету пройдзе ў Нямеччыне ў 2010 г. Зборная Беларусі на папярэднім этапе згуляе ў адной групе з Расіяй, Славакіяй і Казахстанам.