Джулі Фішэр прыведзеная да прысягі ў якасці пасла ЗША ў Беларусі
Дзярждэпартамент паведаміў у сераду, што дыпламат Джулі Фішэр была прыведзеная да прысягі ў якасці амерыканскага пасла ў Беларусі, піша ТАСС.
Аднак да канца не ясна, калі дыпламат можа адправіцца ў Мінск.
«Прызначаны пасол Джулі Фішэр была сёння прыведзеная да прысягі ў якасці нашага галоўнага дыпламата ў Беларусі. Яна прыўносіць багацце ведаў і досвед у працу. Рады таму, што яна будзе прадстаўляць жыццёва важныя інтарэсы ЗША за мяжой», - напісаў у Twitter намеснік кіраўніка прэс-службы Дзярждэпартамента Кейл Браўн.
У пачатку лістапада намеснік памочніка дзяржсакратара ЗША па справах Еўропы і Еўразіі Джордж Кент заявіў журналістам, што канчатковага рашэння аб адпраўцы пасла ЗША ў Мінск няма, пытанне будзе разгледжанае пасля зацвярджэння Сенатам кандыдатуры Фішэр.
Пры гэтым у сярэдзіне верасня першы намеснік дзяржсакратара Стывен Бігэн адзначаў, што ЗША не плануюць адмаўляцца ад адпраўкі свайго новага пасла ў Беларусь, нягледзячы на рэзкую крытыку Вашынгтона ў дачыненні да Мінска і патрабаванне правядзення новых выбараў у краіне.
Раней Фішэр займала пасаду намесніка пастаяннага прадстаўніка ЗША пры НАТА, часовага паверанага ў справах ЗША ў Расіі, а таксама працавала ў амерыканскіх пасольствах у Грузіі і Украіне.
У ліпені Аляксандр Лукашэнка прызначыў паслом Беларусі ў ЗША намесніка міністра замежных спраў Алега Краўчанку.