Вядучага «Беларусь 4» змясцілі ў СІЗА ў Брэсце
Гаворка пра 25-гадовага Канстанціна Свідуновіча. Ён вядучы перадачы «Ранішняя эспрэса» тэлерадыёкампаніі «Брэст».
Гэта рэгіянальны аналаг «Добрай раніцы, Беларусь!». У Брэсцкай вобласці ТРК «Брэст» вяшчае на кнопцы тэлеканала «Беларусь 4».
Канстанцін Свідуновіч. Скрыншот з ютуба
Верагодна, што Свідуновіча затрымалі яшчэ 24 сакавіка (у гэты дзень ён апошні раз быў у эфіры). Цяпер ён змешчаны ў СІЗА, хутчэй за ўсё, хлопец праходзіць па крымінальнай справе па ч. 1 арт. 342 КК (Арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх), пра гэта паведаміла журналістка Аксана Бровач.
У чым менавіта абвінавачаюць Свідуновіча? Удзел у карагодзе, які адбыўся ў Брэсце 13 верасня 2020 года на скрыжаванні праспекта Машэрава і бульвара Касманаўтаў. Па гэтай справе ўжо былі асуджаныя некалькі дзясяткаў жыхароў Брэста і вобласці.
Канстанцін Свідуновіч родам з Пружанаў. Спачатку вучыўся ў МДЛУ, а потым на журфаку БДУ. «НН» датэлефанавалася да бацькі хлопца. Спадар Юрый заявіў, што нічога не ведае пра затрыманне сына.
«Некалькі дзён не размаўлялі», — сказаў бацька.
Пасля гэтага мужчына абяцаў даведацца падрабязнасці, але чамусьці так і не знайшоў часу патэлефанаваць ні сыну, ні ягонай дзяўчыне.
Мама Канстанціна, Галіна Свідуновіч, дастаткова вядомая ў Пружанах асоба, яна рэдактарка газеты райвыканкама «Раённыя будні».
Літаральна 30 сакавіка ў сваёй калонцы Свідуновіч бэсціць тэлеграм-каналы, якія засумняваліся ў наладках падачы кіслароду ў Пружанскай ЦРБ.
У самога Канстанціна паўсюль закрытыя сацыяльныя сеткі, аднак можна ўбачыць, што на аватарцы ў інстаграме ў яго стаіць «Пагоня», а ў фэйсбуку ён посціў выяву бел-чырвона-белага сцяга.
Дзяўчына Свідуновіча Хрысціна адмовілася ад каментароў. «Мы не хочам пагоршыць сітуацыю», — адказала дзяўчына.