Чацвёрты пакет санкцый ЕС адкладаецца да чэрвеня
Чацвёрты пакет санкцый ЕС супраць кіраўніцтва Беларусі не будзе гатовы напярэдадні саміту Еўрасаюза ў замежных справах 10 мая, паведамляе карэспандэнт Радыё Свабода ў Брусэлі Рыкард Юзвяк.
«Магчыма, да чэрвеньскай сустрэчы, калі Беларусь будзе адным з асноўных пунктаў парадку дня. Дагэтуль незразумела, прапануе пакет група краін ЕС ці Еўрапейская служба замежных сувязяў», — напісаў журналіст у сваім твітары.
Пра тое, што Еўрасаюз рыхтуе чацвёрты пакет санкцый у дачыненні да Беларусі, заявіў 20 красавіка прадстаўнік Еўрапейскай службы замежных дзеянняў Люк Дэйвін.