Літоўцы на ВІДЭА зафіксавалі, як беларускія памежнікі парушаюць мяжу
Група супрацоўнікаў памежнай аховы Беларусі, якая нібыта суправаджала нелегальных мігрантаў, якія мелі намер пранікнуць на тэрыторыю Літвы, парушыла літоўскую мяжу. З такім сцвярджэннем у аўторак выступіла Служба аховы дзяржмяжы пры МУС балтыйскай рэспублікі, перадае ТАСС.
«Як відаць на зробленым відэазапісе, беларускія памежнікі ў камуфляжнай форме падштурхоўваюць групу нелегальных мігрантаў у бок Літвы, а потым і самі перасякаюць лінію мяжы», — гаворыцца ў паведамленні. Мяжа ў гэтым месцы праходзіць па невялікім канале з вадой, за якім ужо на тэрыторыі Літвы былі зафіксаваныя беларускія службовыя асобы.
За спінамі беларускіх памежнікаў — невялічкая канава, па якой праходзіць мяжа, як сцвярджаюць літоўцы
Літоўскае ведамства налічыла 12 беларускіх памежнікаў. У раёне інцыдэнту знаходзіліся і супрацоўнікі памежнай службы Літвы, якія перашкаджалі пераходу мяжы нелегаламі. «Пасля паўторнага папярэджання беларусы вярнуліся на свой бок», — апісваецца здарэнне ў паведамленні.
У адказ на заявы літоўскага боку БТ апублікавала сюжэт, у якім паказана, як «на ўчастку Лідскага пагранатрада літоўскія сілавікі жорстка спрабавалі выпхнуць бежанцаў на тэрыторыю Беларусі».