Чыгуначнік Анатоль Каханчык, які трымаў сухую галадоўку, трапіў у шпіталь
З-за галадоўкі ў яго пачаліся сутаргі, ваніты, ціск даходзіў да 220.
Праваабаронцам стала вядома, што гаспадар бел-чырвона-белай хаты Анатоль Каханчык, асуджаны на 25 сутак арышту, трапіў у шпіталь.
З-за моцных праблем са здароўем мужчына плануе спыняць галадоўку.
Нагадаем, год таму мужчына пафарбаваў бацькоўскую хату ў вёсцы Алёшча Полацкага раёна ў нацыянальныя колеры: намаляваў на сценах дзве белыя і чырвоную палосы, а ў акне павесіў Пагоню. Праз пэўны час яго асудзілі за гэта як за правядзенне несанкцыянаванага пікета, а потым пагражалі крымінальнай справай за злоснае хуліганства.
Цікава, што годам раней яго, як брыгадзіра-чыгуначніка, ветэрана Беларускай чыгункі, узнагародзілі медалём «За працоўныя заслугі».