Ад каранавіруса памёр лідар італьянскага руху праціўнікаў вакцынацыі
Лідар італьянскага руху праціўнікаў вакцынацыі Луіджы Марылі памёр на 64-м годзе жыцця ад COVID-19. Пра гэта паведаміў італьянскі тэлеканал TGcom24. У бальніцы мужчына адмовіўся ад лячэння, якое яму прапанавалі.
Фота: liberiamolitalia / Facebook
Грамадскі рух «Вызвалім Італію», які аб'ядноўвае праціўнікаў вакцынацыі, таксама апублікаваў паведамленне пра смерць Марылі, але пра прычыну смерці не згадвае.
Расійская «Новая газета», паведамляючы пра гэта, згадвае і іншыя выпадкі смерці ад каранавіруса вядомых антываксераў у розных краінах свету.
Так, у ЗША ў снежні памёр ад COVID-19 кіраўнік амерыканскай тэлесеткі Daystar Television Network Маркус Лэмб. Мужчына рэгулярна выступаў супраць каранавірусных абмежаванняў, а большую частку эфірнага часу на ягоным рэсурсе атрымлівалі праціўнікі вакцынацыі.
У верасні ад каранавіруса памёр адзін з самых вядомых праціўнікаў вакцынацыі Ізраіля — Хай Шаулян. У відэа, апублікаваным перад смерцю, мужчына расказаў, што ён падлучаны да ШВЛ, моцна кашляе і адчувае ўдушша. «Ён быў цвёрды ў сваёй веры ў тое, што ў дэмакратычнай краіне ёсць магчымасць кожнаму выбіраць свой шлях. І гэта шлях, які ён абраў», — заявіла сястра актывіста.
У снежні вядомы ў Італіі праціўнік вакцынацыі Ларэнца Даміяна трапіў у бальніцу з COVID-19. Ён перагледзеў свае погляды на вакцынацыю і антакаранавірусныя абмежаванні і заявіў, што мае намер вакцынавацца ад COVID-19, заклікаўшы ўсіх таксама гэта зрабіць.
У Беларусі ў лістападзе памёр ад каранавіруса вядомы тэлевядучы Сяргей Філімонаў, які таксама быў актыўным праціўнікам вакцынацыі.