Памежны камітэт зноў абвінаваціў Латвію ў парушэнні паветранай прасторы
Памежны камітэт Беларусі сцвярджае, што сёння каля 12.20 на беларускую тэрыторыю ў раёне населенага пункта Думарышкі Браслаўскага раёна заляцеў латвійскі верталёт Agusta Westland. Ён нібыта заглыбіўся ў Беларусь на 400 метраў, а пасля вярнуўся назад у Латвію.
Верталёт Agusta Westland. Здымак ілюстрацыйны. Фота: Foto-VDW / depositphotos.com
Два дні таму Беларусь таксама абвінавачвала Латвію ў парушэнні паветранай прасторы: нібыта на нашу тэрыторыю заляцеў латвійскі самалёт. Але латвійская памежная служба аспрэчыла абвінавачванне, апублікаваўшы GPS-маршрут самалёта.
Апошнім часам беларускія памежнікі паведамляюць пра выпадкі паветраных парушэнняў мяжы рэгулярна. Так, 4 снежня 2021 года ўкраінскі верталёт нібыта заляцеў на тэрыторыю Беларусі ў раёне пункта пропуску «Новая Рудня», а 24 студзеня бягучага года зафіксаваны факт парушэння мяжы ў раёне вёскі Хмелішча Маларыцкага раёна ўкраінскім беспілотным лятальным апаратам.
Як правіла, пасля праверкі інцыдэнтаў ды прадстаўленых доказаў эксперты маюць сумневы, як гэта было з нядаўнім украінскім беспілотнікам.