Ігар Самкін: «Беларускае — самае маё» — наша ідэя
У Мінску ўжо стаіць каля 60 такіх білбордаў.
У Мінску ўжо стаіць каля 60 такіх білбордаў.
На вуліцах адзін за адным на білбордах з’яўляюцца выявы з беларускай васьміканцовай зорачкай і лозунгам, які нагадвае кампаніі «Купляйце беларускае» і «Будзьма». Звяртае на сябе ўвагу яшчэ слова «дзякуй» на штрых‑кодзе.
Што хацелі сказаць гэтай сацыяльнай рэкламай і хто яе прыдумаў?
«Гэта нашая ідэя, патлумачыў для «НН» выканаўчы дырэктар Асацыяцыі рэкламных арганізацый Беларусі Ігар Самкін. — Яна нарадзілася падчас размовы з прадстаўнікамі Міністэрства гандлю.Я выказаў меркаванне, што сацыяльная рэклама павінна быць лепшай, мець больш дакладны інфармацыйны характар.
Распрацавалі «Беларускае – самае маё» дызайнеры сяброў Асацыяцыі рэкламных арганізацый. У Мінску ўжо стаіць каля 60 выяваў, магчыма, хутка і ў рэгіёнах з’явяцца.
Усё гэта зроблена на добраахвотных пачатках. Хто далучаецца да нашай рэкламнай кампаніі, падтрымлівае ідэю, можа размясціць яе на сваіх білбордах. На дадзены момант так зрабілі ўжо 4 фірмы: «Коларэкспрэс», «Біг Борд», «Багема» і «Праспектпрэс».
Памятаеце рэкламную кампанію 1996‑1997 года «Купляйце беларускае»? Сёння гэтыя некалькі словаў усе ведаюць, а калісьці яе пачынала фірма «Біг Борд», таксама на добраахвотных пачатках. Мы развілі тэму. Хацелася, каб справа гаворка ішла не толькі пра тавары, якія ляжаць на складах, але і пра людзей, якімі беларусы могуць ганарыцца. Не хочацца пырскаць пафасам, але гэта больш наша патрыятычная пазіцыя, чым рэклама».