Украіна закрыла ўсе пункты пропуску на мяжы з Беларуссю
Урад Украіны часова прыпыніў працу пунктаў пропуску праз мяжу з Беларуссю. Таксама закрытыя пункты пропуску на мяжы з Расіяй. Пра гэта на брыфінгу ўвечары 26 лютага паведаміў прэм'ер-міністр Украіны Дзяніс Шмыгаль.
Фота Reuters.com
«Урад прыняў рашэнне аб часовым закрыцці пунктаў пропуску праз дзяржаўную мяжу з Расіяй і Беларуссю. Вельмі важны момант. Грамадзяне Украіны, якія знаходзяцца на тэрыторыі гэтых краін і жадаюць вярнуцца дадому, змогуць уехаць на Украіну спакойна і бесперашкодна», — сказаў ён.
Беларускі бок гэтую інфармацыю пакуль ніяк не пракаментаваў.
У суботу беларусы маглі пакінуць Украіну толькі праз пункт пропуску «Новая Рудня». Цяпер застаецца магчымасць вярнуцца дадому праз сумежныя з Украінай краіны, у прыватнасці Польшчу і Славакію — але варта ўлічваць вялізныя чэргі на межах. Час чакання перасячэння мяжы складае на гэты момант каля двух сутак.