Пентагон: Расія не чакала такога моцнага адпору ўкраінцаў
Першыя дні вайны, абвешчанай Крамлём Украіне, паказваюць на адсутнасць перавагі расійскай авіяцыі ў паветры і рост раздражнення сіл РФ з прычыны жорсткага супраціву, лічыць Пентагон.
Пра гэта інфармуе DW.
Расійскія войскі падчас ваеннага ўварвання ва Украіну сутыкнуліся з больш моцным, чым чакалі, супрацівам украінскага боку. Аб гэтым высокапастаўлены прадстаўнік міністэрства абароны ЗША заявіў на брыфінгу ў суботу, 26 лютага.
Пэўныя прыкметы «ўказваюць на раздражненне расійскага боку тым, што яму на працягу апошніх 24 гадзін не ўдалося рушыць наперад, асабліва ў паўночных раёнах Украіны», — дадаў ён.
Расія пакуль не дасягнула перавагі ў паветры, лічаць у Пентагоне. Украінскія сродкі супрацьпаветранай абароны, у тым ліку авіяцыя, працягваюць дзейнічаць, блакуючы доступ расійскім самалётам у розных раёнах краіны, адзначылі ў амерыканскім ведамстве.
Паводле яго ацэнкі, на ўкраінскай тэрыторыі прысутнічае больш за 50 працэнтаў расійскіх сіл, якія сцягваліся да межаў Украіны на працягу апошніх месяцаў.