У Літве павялічылася колькасць мігрантаў з Беларусі
З Беларусі выязджаюць поўныя аўтобусы: большасць мігрантаў — мужчыны. Пра гэта піша Delfi са спасылкай на літоўскіх памежнікаў.
«Што тычыцца памежнага пераходу Мядзінінкай, то за дзень было каля 200 чалавек. У апошнія дні назіраецца павелічэнне прыкладна на 30%», — сказаў начальнік аддзела памежнага кантролю Віленскай памежнай заставы Гедрус Маткявічус.
Delfi сцвярджае, што ў Літву едуць беларускія мужчыны, якія «баяцца, што іх забяруць у войска і адправяць ваяваць супраць украінцаў».
У апошнія дні з’явілася інфармацыя пра магчымую мабілізацыю ў Беларусі. У сакавіку Міністэрства абароны заяўляла, што «ў цяперашні час ва Узброеных сілах Рэспублікі Беларусь мерапрыемствы па мабілізацыі не праводзяцца». Ці будуць яе праводзіць і калі, у міністэрстве не ўдакладнілі.