Праблемы беларусаў, вымушаных перабрацца з Украіны ў Польшчу, пачалі абмяркоўвацца ў польскім МУС
29 сакавіка прайшла першая сустрэча працоўнай групы па пытаннях беларусаў у Польшчы, паведамляе прэс-служба Святланы Ціханоўскай. Гэтая група была створаная ў Міністэрстве ўнутраных спраў у выніку нядаўняга візіту Ціханоўскай у Польшчу. У групу з беларускага боку ўваходзяць прадстаўніца Ціханоўскай па прававых пытаннях Крысціна Рыхтэр і прадстаўнікі Цэнтра беларускай салідарнасці (ЦБС).
Святлана Ціханоўская ў Варшаве. Фота Паўла Крычко.
На сустрэчы абмяркоўваліся наступныя важныя для многіх беларусаў пытанні:
- Вяртанне пашпартоў грамадзян Беларусі, пададзеных у консульскія ўстановы Польшчы ў Кіеве, Харкаве, Адэсе, Вінніцы, Луцку і Львове.
- Варыянты афармлення легальнага статусу беларусаў, вымушаных выехаць з ахопленай вайной Украіны.
- Выдачу і падаўжэнне гуманітарных візаў на тэрыторыі Польшчы.
- Паскарэнне выдачы рашэнняў у працэдуры міжнароднай абароны.
- Выдачу польскіх праязных дакументаў беларусам, у якіх заканчваецца тэрмін дзеяння пашпарта або калі ён сапсаваны ці згублены.
- Змены ў заканадаўства для выдачы «гуманітарнага побыту» беларусам на працяглы тэрмін.
- Выпадкі дыскрымінацыі беларусаў і як рэагаваць на іх.
Намеснік міністра ўнутраных спраў Польшчы Барташ Гарадзецкі з гэтай нагоды запэўніў:
«Усе беларусы, якія прыбылі з Украіны, знаходзяцца на тэрыторыі Польшчы легальна і не павінны баяцца за сваю бяспеку. Афармленне побыту — гэта фармальна-прававое пытанне, якое патрабуе часу для яго рашэння, а таксама зменаў у заканадаўстве. Беларусы могуць быць упэўненыя, што Польшча іх падтрымлівае».
Сустрэчы працоўнай групы МУС з удзелам Офіса Ціханоўскай і ЦБС будуць праходзіць на рэгулярнай аснове. Наступная сустрэча запланаваная ўжо на гэтым тыдні.