Арастовіч спрагназаваў да 2035 года некалькі ваенных сутыкненняў Украіны з Расіяй
Пра гэта дарадца Зяленскага заявіў у інтэрв’ю Марку Фэйгіну. Ён параўнаў цяперашнюю сітуацыю з той, якая была паміж Ізраілем і арабамі, калі прайшло пяць войн, «пакуль яны зразумелі, што гэтыя метады не дзейнічаюць, і трэба пераходзіць да іншых».
«Так будзе і ў нас. Не ведаю, ці спатрэбіцца пяць, але некалькі ваенных сутыкненняў да 2035 года нам гарантаваныя. Гэта азначае па сутыкненні кожныя два, а магчыма пяць гадоў. І вялікія сутыкненні кожныя сем-восем гадоў», — перакананы Арастовіч.
Тым грамадзянам, якія не гатовыя да такога раскладу, Арастовіч раіць часова пакінуць Украіну.
«Тым, хто да гэтага не гатовы, хто цяпер крычыць аб тым, як жыць і гадаваць дзяцей, патрэбная нейкая іншая краіна. Тут новы Ізраіль. Толькі маштабы круцейшыя і страшнейшыя», — сказаў ён.